shanghai

谈只小恋爱，看看白相相
    男宁一辈子要做100桩大事体，99桩勿要问我，我勿晓得。有一桩，我清爽得不得了，就是男宁一辈子，定规要寻个上海小姐，适适宜宜谈只长篇小恋爱。要是格桩事体没做，格么格辈子男宁做得总归味道勿够浓。格勿是我想出来格花头，是交关男宁自家跟我讲咯，不光阿拉中国男宁（含港澳台同胞）格能跟我讲，交关国际友宁，也声情并茂地格能跟我讲。伊拉横讲竖讲，讲得我再也忘记不脱了。记牢，考量一个男宁的人生品质，是不是跟上海小姐谈过小恋爱，变成一只要紧指标。
    跟上海小姐谈小恋爱，格么真叫味道好，听上海小姐腻了香妃榻上头，捧牢只电话，有声有色嗲过来，啥宁吃得消？勿要讲月亮，就是冰糖一样大咯钻戒，咬咬牙齿，也是要答应下来送给伊格。
    我格女朋友，35岁咯熟女，天生有点恋父，最近爱上一个上海男宁，50岁，初老，优质得哈煞宁。熟女小恋爱谈得水深火热，总算寻着对伊胃口格男宁了，乐胃得不是一眼眼。两家头日日夜夜捂了一道，一分钟不看见也相思，真真叫我眼热死脱。上海熟女千嗲万嗲，弄得个上海熟男围牢伊七荤八素，奔进奔出，拿格熟女宠得不像闲话。格么下头我就口述实录一记，写点伊拉谈小恋爱的片段，大家看看白相相。
    早上厢困醒，眼睛张开来，男朋友电话已经打到枕头上来了，darling啊，今朝想白相点啥？上半天去荡荡马路好伐？sale了，么事交关便宜，看看有啥称心咯，买点拨侬，下礼拜侬过生日了。等歇我去接侬，阿拉早点去，百货公司里厢人少点，等到下半天么，大户困醒了统统跑出来了，people mountain people sea，darling侬哪能抢得过人家？上海熟女一声不响听下去，听到最后，轻轻交“嗯”了一声，电话里厢，男朋友听不清爽伊啥心思，勿晓得darling欢喜勿欢喜，只好急吼吼再追一声，darling，啊好？上海熟女慢吞吞，声音轻得听都听不见，讲，嗯，好咯呀，格么等侬来接我。男朋友当场酥脱，夹紧两张信用卡，穿好一套挺刮格西装，妖得只国产版咯黑手党一样，飞奔出来。
    南京西路一只小圈子荡下来，买了两样小么事，上海小姐多少挑剔，看得中格么事，两样三样顶多了。啥地方像点暴发户，恒隆兜一圈，纸头袋袋拎也拎不动，恨不得脚也举起来，真真乡下宁白相大世界，吃相勿好看。走出恒隆，上海小姐跟男朋友讲，darling啊，对面咯无印良品去兜兜好伐？伊拉咯麻布床单灵光得来，我欢喜煞了。无印两品荡好，旁边走过王家沙，上海小姐看见蟹粉小笼，格么走不动了，想吃呀。两家头手搀手跑进去，坐下来，蟹粉小笼热腾腾送上来，上海小姐慢慢交一只吃下去，对面男朋友问过来，darling 哪能？适宜伐？上海小姐一直超级满意的媚眼飞过来，男朋友笑也笑不动。吃了一顿王家沙点心当中饭，走出来咯辰光，上海小姐对牢男朋友，讲，王家沙现在也真真没腔调，哪能拿蟹粉小笼跟老虎脚爪摆了一道卖？男朋友讲，是咯，真勿懂经，有眼缺兮。
    格么下半天哪能白相呢？现成咯，对面听评弹呀，两点档，几花写意。今朝说书先生讲白娘娘跟许仙，白娘娘妖滴滴，许仙木乎乎，噱头好得吃不消。顶顶写意么，是书场里厢，两点档咯观众，交关都是老克勒，90岁老伯伯，笔挺笔挺，赞。
    评弹听好，走两步，到波特曼吃杯咖啡，全上海，格搭一杯咖啡味道顶顶浓，上海小姐咬牢男朋友耳朵开玩笑，darling侬看呀，格杯咖啡，浓得有眼吃不落，下趟要带只保温杯，吃一半，打包一半。男朋友拉牢伊小手，笑煞了。
    咖啡慢慢交吃好，格么已经黄昏了，上海小姐讲，darling啊，野出来交关辰光了，有眼吃力了。男朋友讲，格么我送侬回去，补困只中觉，好伐？车子送到楼下头，上海小姐下车之前，关照一句，darling明朝会了，明朝么，早点打电话给我，侬电话不来么，我会想侬咯呀。男朋友酥得粉粉碎，回转去眼睁睁失眠到天亮。:cool:

markelei00

小姑娘用撤那娘不大文明. 就象说戆le(魁北克发音)一样.:rolleyes:

Post by carson
上海话（打字）太差，建议“册那”用“扯那娘”，这样跟“娘希匹”才有的一拚。

xuxiang66

侬那嫩嘎尼腥额拉…………

.XM.

侬当心吃生活.

Post by Oldstyle-
这坛子里嘀阿拉上山海女人可是不少耶！知道嘀有阿福，拉拉，老唐。。。ETC。好像小卡是个上海女婿，脚上是不是毛绒绒嘀就不晓得啦！